200 tíma viðurkennt jógakennaranám hefst í ágúst 2027

Karma Jógastúdíó kynnir 200 tíma jógakennaranám veturinn 2027–2028, viðurkennt af Yoga Alliance.

Námið hefst í ágúst 2027 og lýkur í janúar eða febrúar 2028. Það er skipulagt sem sveigjanlegt fjarnám þar sem lifandi kennsla á Zoom, fyrirfram uppteknir fyrirlestrar, verklegar æfingar og sjálfstæð verkefnavinna fléttast saman.

Námið hentar bæði þeim sem stefna að því að verða jógakennarar og þeim sem vilja öðlast dýpri þekkingu á jóga, líkamanum, öndun, heimspeki og eigin jógaiðkun.

Áhersla er lögð á að nemendur öðlist traustan fræðilegan grunn, góða verklega færni og sjálfstraust til að leiða jógatíma. Jafnframt er lögð rík áhersla á að hver nemandi fái tækifæri til að þróa sinn eigin kennslustíl.

Fyrirkomulag námsins

Námið skiptist í sex námslotur sem dreifast yfir haustið 2027 og fram á nýtt ár. Það hefst í ágúst 2027 og lýkur í janúar eða febrúar 2028.

Námið er skipulagt með það að leiðarljósi að nemendur geti stundað það samhliða vinnu, fjölskyldulífi og öðrum skuldbindingum. Áhersla er lögð á sveigjanleika án þess að það komi niður á gæðum kennslunnar eða þeirri þekkingu og reynslu sem nemendur öðlast.

Kennslan byggist á þremur meginþáttum:

Lifandi kennsla á Zoom

Í hverri námslotu hittist hópurinn í lifandi kennslutímum á Zoom. Fjöldi kennslutíma getur verið mismunandi eftir viðfangsefnum hverrar lotu. Þar verður farið yfir námsefnið, unnið með anatómíu, líkamsbeitingu, öndun og kennslutækni, auk þess sem tíminn verður nýttur í umræður, spurningar og verklegar æfingar.

Þótt námið skiptist í sex lotur felur hver lota því í sér fjölbreytta kennslu og verkefnavinnu sem dreifist yfir lengra tímabil.

Upptökur og sjálfstætt nám

Nemendur fá aðgang að fjölbreyttu námsefni í formi fyrirfram tekinna fyrirlestra og kennslumyndbanda. Þeir geta horft á upptökurnar þegar þeim hentar og farið yfir efnið eins oft og þeir vilja.

Hluti námsefnisins verður sendur út áður en viðkomandi námslota hefst svo nemendur geti undirbúið sig fyrir lifandi kennsluna. Þannig nýtist sameiginlegur tími á Zoom betur til umræðna, spurninga og verklegrar vinnu.

Verklegar æfingar og verkefnavinna

Á milli lota vinna nemendur fjölbreytt verkefni, æfa jógastöður, útbúa kennsluáætlanir og þjálfa sig í að leiðbeina öðrum.

Nemendur mynda litla æfingahópa, 3-4 í hverjum hópi, þar sem þeir geta æft sig saman og öðlast aukið öryggi í kennslu.

Sem hluti af náminu munu nemendur einnig kenna 15–20 jógatíma fyrir vini, fjölskyldu eða aðra áhugasama. Þannig fá þeir tækifæri til að öðlast raunverulega kennslureynslu áður en náminu lýkur.

Sveigjanlegt nám með góðu svigrúmi

Við skipulag námsins er sérstaklega tekið mið af því að nemendur þurfa tíma til að tileinka sér námsefnið, vinna verkefni og öðlast reynslu af kennslu.

Desember verður því hafður léttur námsmánuður, án mikillar nýrrar yfirferðar eða umfangsmikilla verkefnaskila. Nemendur geta nýtt þann tíma til að rifja upp námsefni, vinna áfram með verkefni eða sinna kennsluæfingum eftir því sem hentar.

Í janúar og eftir atvikum febrúar 2028 verður síðan svigrúm til að ljúka kennsluæfingum, skila lokaverkefnum og undirbúa útskrift.

Með þessu fyrirkomulagi viljum við skapa gott jafnvægi milli fræðilegs náms, verklegrar þjálfunar og þess tíma sem þarf til að þekkingin festist í sessi.

Markmiðið er ekki aðeins að útskrifa jógakennara með góða fræðilega þekkingu, heldur kennara sem hafa öðlast raunverulega reynslu, sjálfstraust og öryggi til að leiða aðra í jógaiðkun.

Kennari námsins

Guðrún Reynisdóttir er stofnandi Karma Jógastúdíó og hefur E-RYT 500 kennararéttindi frá Yoga Alliance.

Hún hefur víðtæka menntun og reynslu á sviði jóga og hefur meðal annars sérhæft sig í áfallamiðuðu jóga, sómatískri nálgun, Yoga Nidra, Yin Yoga og stólajóga.

Guðrún leggur sérstaka áherslu á að jógakennsla sé aðgengileg, örugg og byggð á virðingu fyrir einstaklingnum. Í kennslu sinni vinnur hún mikið með tengsl líkama og hugar, taugakerfið og mikilvægi þess að hver einstaklingur fái að nálgast jóga á eigin forsendum.

Námsgjald

Verð fyrir allt námið er 399.000 kr.

Innifalið í námsverði er allt námsefni, aðgangur að upptökum, kennsla á Zoom og leiðsögn við verkefnavinnu.

Nánari upplýsingar um greiðslufyrirkomulag verða kynntar síðar.

Opinn kynningarfundur í desember 2026

Í byrjun desember verður haldinn opinn kynningarfundur á Zoom þar sem námið verður kynnt ítarlega.

Á fundinum verður farið yfir uppbyggingu námsins, námsefni, fyrirkomulag fjarkennslu, verkefni og kennsluæfingar. Einnig gefst tækifæri til að spyrja spurninga og fá nánari upplýsingar.

Áhugasömum er boðið að skrá sig á kynningarfundinn með því að senda tölvupóst á greynis@dohomeyoga.com.

Nánari upplýsingar um dagsetningu og tímasetningu fundarins verða sendar þeim sem skrá sig.

Við hlökkum til að kynna námið og taka á móti nýjum hópi verðandi jógakennara haustið 2027.

Karma Jógastúdíó